МЭНДЧИЛГЭЭ

 Ардын хувьсгалын ялалтын уухайтай, амуу будааны асгарсан шаргиатай, эх орны дархан хойд хил өөдөө хийморьтой Сэлэнгэ сайхан нутагт хамгийн анхны цаг уурын өртөө Баянгол суманд 1939 оны 01 дүгээр сарын 01-нд байгуулагдаж улмаар ихэнх сумдад ус, цаг уурын өртөө харуулууд дараалан байгуулагдан ажиллах болсон тул УЦУАУЕГазрын даргын 1964 оны 08 дугаар сарын 27-ны өдрийн 12 тоот тушаалаар Сэлэнгэ аймгийн Цаг уурын товчоог байгуулсан түүхтэй. Өнөөдөр Сэлэнгэ аймгийн 13 суманд 24 ус, цаг уур, байгаль орчны хяналт шинжилгээний өртөө, харуулууд ажиллаж байна. Ус цаг уурын салбарт техник технологийн шинэчлэл тасралтгүй хийгдэж, өндөр хурдны цаг уурын өртөөний автомат станцын мэдээг 5 минут тутамд интернет орчинд харах боломжтой боллоо. Мөн цаг уурын харуулууд агаар хөрсний температур болон агаарын чийгшлийг автомат багажаар хэмжиж эхлээд байна. Ус цаг уурын салбар маань өнгөрсөн хугацаанд олон бэрхшээл саадыг даван туулж тасралтгүй үйл ажиллаагаа явуулж аймаг орон нутгийнхаа хөгжилд өөрийн хувь нэмрээ оруулсаар ирснийг тэмдэглэн хэлэхэд  таатай байна. Сэлэнгэ аймаг Монгол улсын газар тариалан, мал аж ахуйн эрчимжүүлсэн бүс нутгийн хувьд цаг агаарын богино, дунд, урт хугацааны урьдчилсан мэдээ хамгийн чухал мэдээлийн нэг бөгөөд цаг уурчид бид аль болох өндөр нарийвчлалтай мэдээгээр ард иргэд малчид тариаланчдаа шуурхай хангахыг зорилтоо болгон ажиллаж байгаагаас гадна бэлчээрийн болон таримал ургамлын ургацыг нэмэгдүүлэх зорилгоор Цаг агаарт зориудаар нөлөөлөх үйл ажиллагааг 2008 оноос явуулан хур тунадасны хэмжээг тодорхой хувиар нэмэгдүүлэн үр дүнтэй ажиллаж байна.  

 Монгол улсад Ус цаг уурын байгууллага үүсч хөгжсөний 100 жил, Сэлэнгэ аймагт Ус цаг уурын алба байгуулагдсаны 60 жилийн ойн баярын мэндийг үе үеийн цаг уурчдадаа хүргэж та бүхэндээ эрүүл энх, аз жаргал сайн сайхан бүхнийг хүсэн ерөөе.

Дарга                                  О.Ганбат